بعد لي كنت وحدي ربي لقاني بيك

بعد لي كنت وحدي ربي لقاني بيك...وغيل بنظرة وحدة في قلبي عشقتك

نهار لي جات عيني في عينيك...قلبي دق وعقلي جا لعندك

في مدة صغيرة ربيت الولف عليك...رجعت وين ما نكون وحدي يقابلني خيالك

راني نْباتْ طول الليل نفكر فيك...هامل من بكري و كمل عليا غرامك

انا نتي في البنات قلبي لي راهو مَتْمَنيك...لكن مالقيتش طريق لي يجيبني لعندك

مالقيت حتى طريق يقربني ليك...نبغيك نبغيك وخايف نقولهالك

خايف ومارانيش خايف من كلمة نبغيك...انا خايف ادا ديريني خداع في بالك

هادا هو الشي لي خلاني نشوف وساكت...على هادا لي ماقدرش لساني يتكلم

عارف بلي الزمان دار والساعة نقلبت...وسُورْ الحق ليوم رابو حجارو وتهدم

وشمعة الحق ليوم انطفأت ودابت...ورانا نشوفو في الباطل قدامنا يَتْنعم

وشمعة الحق غطاوها الغيوم اختافت...كثرت الحقرة والظلم مين الزمان غَيَمْ

الوقت ليوم راهو يمد غيل لشمايت...الراجل يشوف غيل بالعين مايقدرش حتى يتكلم

الراجل في وقتنا نْحْقَر ودموعو سالت...الخداع زاهي و مولا النية في الفراغ يحلم

في حياة الغرام عيطا رجال نحقرت...وشحال من عاشق راهو يبات في فراشو يتألم

وشحال من حمامة في قلوب رجال كبرت...وبعد لي ربات الجناحين هجرت المراسم

وصاحبت غراب وجابلها ربي وين وصلت...وكانت تظن بلي الزهو في هاد الدنيا دايم

وبعد لي فات الحال بكات بالدموع ندمت...وحين رجعت للوكر صابت سرب من الحمام حوم

ها كي يصرا لجميع الغالطا لي غلطت...لي سمحت في الرجال كل تندم

انا قلبي يَنْضَر كي نشوف الورة دبالت...نبكي كي نشوف الورة في يد البهائم

انا ضد الظلم والحقرة وين ما كانت...عشت مظلوم والحمد لله كي ما عشتش ظالم

قبلك نتي مئة مَحْنة فاتت...وبِ مْحانْ قلبي غيل ربي هو العالم

هادا شحال وانا في الدنيا نعاني...وماكانش لي كان داري بيا

جميع من يشوفني يقول هادا زهواني...وانا قلبي مكوي بمئة كِيَة

مجروع من الداخل وظُري دخلاني...ومالقيتش اي طبيب لي يلقالي دوايا

نعرف بلي لو كان نعيدلك محاني...قلبك كيما كان يحن عليا