الهاتف يرن ويرن

الهاتف يرن ويرن

الهامل : الو وي شكون

حبيبة القلب : شكون لي كنت تستنى غيل في لي تبغيك وتموت عليك

الهامل : انا قتلك لو كان جيتي تبغيني لو كان راكي جيتي لعندي شفتيني

حبيبة القلب : علابالك بلي مانقدرش نجي ليك لوكان يسمعو بيا خاوتي يقتلوني

الهامل : املا علا شراكي تقوليلي نموت على جالك بعد ما تفكري في كلامي جاوبيني انتي

باغيا تلبسيني كمامة بكلمة نحبك غيل باش بعد الفاتحة تقولي الجايح داني

الهامل راهو يقول الحب لي تبنى في التيليفون والبْرية عمرو ماسكن القلوب حالو كي

حال زبدة طرية غيل طل الشمس يدوب

الحب ماهوش كلام تقوليهلي بفمك......ولا حروف وقلوب ترسميهملي في البْرية

انا خلاص كرهت ومليت من غرامك......غيل نْسايْ عنواني ديري مْزية

ارجعت نَحْشَمْ حين يجيني وجابك....نحسم حين نشوف الفاكتور يشوف فيا

حتى الفاكتور وعرف لي بيني وبينك....وقصتي راها رجعت معاك في البوسْتْ حكاية

هدا شحال وانا محقور في عشقك.....طايح بقلبي وعايش عيشة النوايا

شحال من ليلة جبتها سهران مع خيالك....غيل انا والشمعة نتخيلك جالسة حدايا

انا صح كنت عايش غلطان في غرامك..لاكن ربي مين راد وقدر راني في قنْتْ من العمية

مين صحت راني معول ننسى لي بيني وبينك...القلب لي تفكرك نكويه بمئة كِيَة

الحمد لله لي عرفت قدري وقدرك...عرفتك ماتبغينيش غيل تكدبي عليا

ديما تداعيلي بالغرام في كلامك...تقوليلي انت في البال صباح وعشية

تقوليلي لو كان نَقْدَرْ بالدموع نكتبلك...وبدموع القلب لي راني نكتبلك في البْريَة

تقوليلي لو كان كانش ما يصرالك...نهون العمر من بعدك وما نبقاش حية

تقوليلي نضحي بالكل على جالك...المهم انت قدر ظروفي وشوف ليا

انا هاد الكلام قاع سمعتو منك...لكن مازال ما عرفتش محبتك وين هي

المرا لي تقول لحبيبها نحبك...على الاقل تضحي وتبين شوية

انا نتي ماشفت حتى تضحية منك...محروم حتى باش نشوفك في جلسة حْدايا

هدا شحا لوانا متمني نشوفك...هدرت وغنيت ومافهمتيش معنى غْنايا

الحب عمرو ماكان كلام تقوليهلي بفمك...ولا حروف وقلوب ترسميهملي في البْريَة

انا كرهت ومليت من غرامك...غيل نْسَايْ عنواني ديري مْزِيَه